De Ris geet op d’Rees

De Beetebuerger Comic mat dem gréissten Held vu Lëtzebuerg

Jidderee kennt wuel de bekanntsten Awunner vu Beetebuerg.

Hien ass bal 10 Meter grouss a wunnt am Märchepark.

Jo, genee, et ass de schlofende Ris. De Koloss mat der rouder Mutz, de laange, bronge Stiwwelen, dem hellbloe Pullover an der karéierter Box. Hien ass d‘Wahrzeechen vum „Parc Merveilleux“, deen 1955 opgaangen ass.

Ronderëm dëse markante Personnage ass de neie Comic „De Ris geet op d’Rees“ entstanen.

Pünktlech fir de LiteraTour 2022 huet d’Gemeng Beetebuerg, zesumme mam Texter Lucien Czuga an dem Zeechner Andy Genen de Ris op mysteriös Weis waakreg gemaach an hien op eng spannend Rees duerch d’ganz Gemeng Beetebuerg geschéckt. D’Lieser kënne sech op eng Geschicht voll Humor a lëschteg Personnage freeën.

D‘Storyboard gouf am Virfeld mat den Awunner vun der Gemeng entwéckelt.

Hei wollte mir wëssen:

Wat gesinn d’Kanner an dem Personnage vum Ris?
Wat verbannen déi Erwuesse mam Ris?
Wat ass de geschichtlechen Hannergrond?
Wat kéint de Ris am Comic undreiwen?
Wéi eng Aventuren erlieft de Ris?

De Comic ass ab Mee an dräi Sproochen (LU, FR, EN) am Commerce disponibel, souwéi am Parc Merveilleux an an der sozialer Librairie „de Bicherkueb“, rue de la Gare, Beetebuerg.

Den interaktiven Themewée „De Ris geet op d’Rees“

E kreative Ris-Parcours duerch d’Gemeng, dee laangfristeg erlieft ka ginn.

Kommt a begleet de Ris op senger Rees!
Mir kucke ganz genee op déi Plazen an der Gemeng, wou de Lucien Czuga an den Andy Genen de Ris op seng Rees schécken. D’Zil ass et, dës Rees an der Realitéit nozezeechnen an et esou de Lieser z’erméiglechen, säi Parcours „live“ z’erliewen.
Besicht ons zu Beetebuerg, erlieft dem Ris seng Rees an entdeckt verschidde Konschtwierker déi relevant Zeenen aus dem Comic opgräifen an an der Gemeng Beetebuerg an déi reell Welt iwwerdroe ginn.

D’Iddi fir de Comic kënnt vun der ASBL „Les Trésors de la BD“.

All weider Informatiounen iwwer de Parcours an d’Kaart fir erofzelueden fann dir hei, soubal e färdeggestallt ass.